ALBANIA on Line TV

Marre nga RD

Basha takon kryebashkiakun Alemanno, i cili ofron ekspertizën e arkitektëve, planifikuesve, inxhinierëve të Bashkisë së Romës

Roma asistencë për projektet strategjike e planin urbanistik

Bashkia e Tiranës do të marrë asistencë nga Bashkia e Romës për projektet strategjike dhe planin urbanistik. Kjo u konfirmua nga Kryetari i Bashkisë së Romës, Gianni Alemanno gjatë një takimi me kryebashkiakun Basha, i cili ndodhet për një vizitë zyrtare në kryeqytetin italian. Kryetari i Bashkisë Basha e njohu homologun italian me planet e zhvillimit të Tiranës. Kryebashkiaku Basha theksoi se ekspertët më të mirë vendas po merren me hartimin e planit urbanistik, sikundër e njohu me projektet strategjike, si zgjatimi i bulevardit në drejtim të Lumit të Tiranës, rehabilitimi i Lumit të Tiranës, ndërtimi i linjave të tramit, ndërtimi i terminalit të pasagjerëve etj. Kryetari i Bashkisë së Romës premtoi ndihmën e Bashkisë së Romës, departamenteve të specializuara, që nga ai i urbanistikës tek ai i infrastrukturës, për jetësimin e këtyre planeve, në përputhje me standardet më të larta evropiane, si dhe me vënien e ekpertizës së arkitektëve, planifikuesve, inxhinierëve të Bashkisë së Romës, në dispozicion të Bashkisë së Tiranës. "Një ofertë shumë bujare, e cila natyrisht do ta ndihmojë Bashkinë e Tiranës, për të përshpejtuar procesin e përfundimit të planit urbanistik, si dhe për të forcuar elementet e trashëgimisë kulturore dhe historike të projekteve të tilla, siç është ai i dyfishimit të bulevardit të Tiranës", tha Basha. Një theks të veçantë në takim pati edhe shkëmbimi ekonomik mes dy vendeve. Kryebashkiaku i Romës u angazhua për të identifikuar të gjithë kompanitë që kanë interes për investime në Tiranë dhe së bashku me ta të vizitojë së shpejti Tiranën. Basha e njohu homologun e tij me masat që Bashkia e Tiranës ka marrë për një qytet sa më miqësor për biznesin, ku biznesi mund të operojë me procedura më transparente, më të shkurtra dhe të paguajë një taksë më të ulët në mënyrë që zhvillimi ekonomik i qytetit të njohë vazhdimësi. Në këtë kuadër, Basha e njohu me masat konkrete të marra nga administrata e tij, si heqjen e 60 tarifave dhe uljen e taksave bashkiake, masat për nxitjen e investimeve vendase dhe të huaja dhe punësimin, si prioritet kryesor të Bashkisë së Tiranës, ku me vendim të Këshillit Bashkiak do të operojë pa taksë, për një periudhë katër vjeçare, çdo biznes që punëson mbi 50 punonjës. "Unë e ftova zotin Alemanno, që në vizitën e tij të ardhme në Tiranë, e cila është vizita e tij e parë në Tiranë si Kryetar i Bashkisë së Romës, të sjellë me vete një delegacion investitorësh romanë, një pjesë e mirë e të cilëve e zhvillojnë aktivitetin e tyre në Bashkinë e Tiranës dhe në Shqipëri, por një pjesë jo e vogël e tyre kanë shfaqur interes, në projektet strategjike të Tiranës, por edhe në sektorin privat në Tiranë.

Elis KUÇI